因為之前蒸蘿蔔糕覺得 D 錫紙盆太淺，所以去街市買咗兩個直徑７吋，高３吋嘅不銹鋼蒸砵。可以啱啱好放得落個電子蒸爐到！一次可以蒸兩底，fit 到漏！不過蘿蔔只能刨３斤１０兩左右，少於４斤，否則就會好似我今次咁，多出一碗仔份量 
我仲專程去西環買臘腸，本來唔知邊檔好，一路由上環行到西環 D海味鋪，腍住搵檔多人幫襯嘅咪得囉！點知冇乜，是但行入一間買咗斤。跟住就行番轉頭。哈，點知行番到東華醫院個路口，先醒起，平時行過有間臘味鋪，嘩，今日人生人海！洗乜去西環呀！
於是貪高興又買多斤，睇下邊檔好食 D, 我估應該都係上環呢檔架啦！
今次特別買埋膠手套，但係點知仍然＂拿＂手！
呢個蒸爐好好用，特別係 one man band，煮餐飯，一次食唔哂，可以待下次蒸番熱食，最緊要係唔洗睇火，啱哂我呢 D 大頭蝦！蒸包又軟林林，唔會好似叮完之後乾哂！
睇下，size 啱啱好！
不過，今次唔記得留番少少炒好咗嘅臘腸粒放係面添！
08年嘅下半年沒有任何潛水計劃，皆因想全部時間投入工作。豈料１２月加入了失業大軍。現在猛撩人去潛水，但未有著落。
閒在家裡，又提不起勁去做下運動，也許是過去一年太倦，實在很須要休息。
過去因為太忙，只能騰出很少時間做義工服務，所以正好把握這段時間多做探訪。
前幾天去做探訪，與病友提起我媽媽煮的蘿蔔糕很好食，（其實只有蘿蔔糕好食而已！
第二天我立刻打電話給媽媽，可惜她這一兩天忙著，而我自己反正閒着，所以決定自己做。一方面打電話問媽媽做法，二方面上網找資料。現在 internet 實在提供了不少資訊，很多東西都可從網上學到。
中午先去街市買了４斤蘿蔔，３蚊斤，很新鮮。後來去百X，佢地做特價，賣８毫子一磅，不過當然冇街市果 D 咁新鮮啦！
綜合亞媽做法和網上教嘅做法，我嘅處女作做法如下：
材料：
白蘿蔔４斤 (蒸出來有結果有 2個半鍚紙盆嘅份量)
兩孖臘腸，一兩蝦米（40g)，100g冬 菇 ( 約 20 隻)
（看自己的喜好，可加入其他材料）
粘米粉 300g (因為蘿蔔多水，所以應該多些粘米粉會結實些，400g應好些)
調味料
糖 1 茶匙
胡椒粉 1 茶匙
鹽 2 茶匙
雞粉 1 茶匙
做法:
1. 先將臘腸，蝦米，冬菇用水浸軟切粒。
2. 將白蘿蘿蔔絲去皮 ， 刨絲，搾水，水與絲分開。
3. 蘿蔔水加入粘米粉同一茶匙栗粉攪勻成粘米粉漿備用。
4. 燒紅鍋，下油炒 蝦 米 、冬 菇、臘腸粒等再起鍋。
5. 燒紅鍋， 下蘿蔔絲炒至七成熟，下粘米粉漿，改用中火邊煮邊攪成糊狀（一定要攪到杰撻撻至得），下調味料，把大部份的蝦米 、冬 菇、臘腸回鍋炒至收水 。留起少少作鋪面。
6. 把炒好的材料倒入鍚紙盆，把留下的蝦米粒等材料鋪在蘿蔔糕面，大火蒸了 50分鐘。（蒸45至60分鐘，可以筷子插入唔黏便可）
製成品：
第二天，拿了一底去送人，她切了差不四份一出來蒸熱食，話好好食，眨眼間全部食完！佢滿足時我更加開心！
＊＊ 原來用手搾蘿蔔水嘅時候係會＂拿＂手，所以最好戴對手套！ ＊＊
