再戰詩巴單 - 第六Day

2008.07.05

本來個 package 唔包今日嘅潛，但係既然嚟得，梗係潛到盡．不過都只能潛兩個，因為明天要走人！

Dive #1 – Barracuda Point

兩朝早都無緣見到 Bumphead，所以唔洗講梗係搏多次！雖然大家都唔講，不過其實都係好想見到嘅！同樣係 5:30am出發，我已經抱住平常心，有又好冇又好．一落水都係無，DM又叫我地捉住條繩．嘩！唔好玩啦！又滑水？今次仲慘，因為隻船倒後行，扯下扯下，又冇手套，隻手痛到不得了．當大家都差不多頂唔住嘅時候，DM終於叫我地上船．玩死！隻船開了一會，又叫我們落水！搵鯨鯊都冇咁辛苦！今次落水，唔知點解有個 Buddy好似落唔到咁，我一路望住佢．突然有人係到揮晒手咁“樣”我，我擰轉頭一望，嘩！ Bumphead 呀！好多條呀！

完咗呢個 Dive　之後，大家都覺得今次的詩巴單潛真的無憾了！

Dive #2 - Barracuda point

今個係 last dive啦！基本上要睇嘅野都睇到啦，所以大家都似乎特別盡情．DM話帶我地睇 Frog Fish，我以為係大頭果種，原來都係 Leaf Scornpion！不過無所謂，乜都係好嘅，又係果句，有得潛就得啦！ 

Last dive都係指定動作同個海同D魚講Bye bye！
今年冇好似之前咁日日五潛．因為大師兄們有特別訓練，所以6 日潛咗3+3+5+4+4+2=21個

再戰詩巴單 - 第五Day

Dive #2 – Drop off (入龜窿) 續篇

 

Dive #3 – Gurnard Ground (Kapalai)

開船後 DM問我們有什麼想看，我說想睇 Ghostpipefish．因我知道我的兩個朋友都應該未見過．於是我們便去了 kapalai，原來原定是去 Mabul的．不過冇所謂啦！不過原來 DM帶我們看的並不是我只的那種 Ornate Ghostpipefish，而是通常一出現就係打孖上嘅 Robust Ghostpipefish！之後仲俾我發現了幾條 Jawfish．我搞晒樽叫人睇，不過佢地好怕醜，好快就已縮回個洞到．

係條 wreck 上的Nudi．　

Dive #4 – Jetty (Night)

超大的 cuttlefish，晚晚都見到．

係 Jetty到有個新住客，係一條半隻手掌咁大嘅 Clown Frog Fish．之前的 Night dive其他人都見過，我因為走開了影魚毛蝦毛，所以睇唔到，今晚這個 Trip的最後一個 Night，好彩多得亞蛇我至睇得番．好趣緻呀！

 

再戰詩巴單 - 第五Day

2008.07.04

Dive #1 – Barracuda Point

今日第二次5:30am 出發，希望睇到 Bumphead．一早去到餐廳，至知今日會入龜窿，於是走番入房攞枝大燈．入龜窿係第二個潛，因為要等 D師兄係第一個潛時 set好 D繩先．

第一個潛認真黑仔，隻船駛到去 Dive site，孭起枝樽，點知成枝樽跌咗落嚟，原來背板兩粒鑼絲都甩咗，不過好彩執得番，冇唔見．拿拿淋上番實．但係點知一 roll back落水，個 stroke同枝架就肢解咗，成個 stroke沉落水，好彩即時發現，而且水淺，所以立刻 fin落去執番．但係當一半人落咗水後，DM話唔啱位，於是叫我們拉住條繩，然後開船．開頭以為唔係去好遠，一面拖行時，有 Buddy叫“鯊魚呀！”我望了一望，跟住又叫唔知 D乜，唉，離咁遠有乜好睇呀？不如慳番D氣，落水至睇啦！點知大大話話拖咗成十分鐘．好彩慳咗D氣．不過結果都係見唔到 Bumphead，唯有繼續潛，睇下其他野．

唔順嘅野，係一不離二，二不離三．可能因為面霜的原因，落到水個 Mask不停入水，不停清鏡，卒完面都唔得，好煩呀！跟住部相機影影下又 Hang埋！Focus唔到，微距又冇反應！成群 Barracuda停咗係前面，走到好近，以為可以影番張 Barracuda 大頭相，點知部機直情唔着潻！不過上咗水一陣佢又好番！唉！



Dive #2 – Drop off (入龜窿)

講真未入之前真係有少少緊張，因為唔知自己有冇“密室恐懼”嘅反應！落咗水，係水面，唔知點解，覺得唔係好 alright．我叫師兄幫我check 下有冇漏氣．嘩！居然真係漏氣．佢叫亞蛇再過來睇，原來漏得好勁．挍咗好耐都唔掂，結果要上船．原來個O ring霉晒，要換過個．

其實大家未落水之前，係船到係聽到有漏聲，但是 locate到是另外一枝，唔係我個枝．而自己可能戴住個 Hood，所以聽唔真 D聲．點都好啦，幸好及時發現，又好彩隻船未走，否則便與龜洞無緣，仲要累街坊．

係龜窿入口個”骷髏骨”警告牌到，撞見其他5個唔入龜窿的 Buddy．有了上次影呢種咁黑的環境的相，今次影得好少少，起碼冇乜粒粒，仲見到個樣．

係洞口幫其他人影咗幾張相，逗留咗十分鍾左右便正式入洞．係水面亞蛇已經 briefing咗要沿住條繩入去，亞蛇行頭我行尾．走的時候就我行頭，亞蛇行尾．唔準掂任何野．所以亞蛇一俾手勢入洞，我們三個人便好有秩序地一個跟一個慢慢入．洞口深廿米左右，一入洞，就立刻發現相比之下，我枝 UK100真係好弱！

入洞條路，就好像穿越一條隧道一樣，一至兩個人身位闊，有少少迂迴斜上．大約十分鐘左右，便到達了龜窿最外層的一個 chamber．D 師兄已經係到”青寧”梗．

呢個大廳個底大約22米，有四副龜殼．不過因為自己枝燈弱，所以只能趁住其他人照住 D殼時，才夠光影．所以只影得幾張相．

再戰詩巴單 - 第四Day

2008.07.03

第一個dive 係 Sea Venture (Mabul) = 鑽油台

因為 resort安排隔日早出發睇 Bumphead，所以今日第一個 Dive係 schedule咗 9點．昨天師兄借咗一條喉給我，接駁個 inflater，所以唔洗再“吹”漲個 bladder．顧少樣野，於是攞埋枝 stroke嚟玩．全程都係到試枝燈．因為正式只用過一次，係上次去Southern Leyte 時，但是完全唔知點挍 D角度同 intensity．冇張相得．於是用咗幾個潛就放棄咗，用番 internal flash．今次再接再厲，因為有 Buddy back up．有佢影細野我放心，總之有乜我影唔到，就俾個 signal佢補飛．

成個潛我都留後，主要影大野嚟試枝燈，所以有時 DM搵到俾我地睇，我都冇“供”埋去．不過影咗廿幾張，大多數都打唔中，得呢張相叫做見得人． 

我把“善良之刀”今次又再次出動．係鑽油台下面見到條 Batfish個口左邊俾個魚鈎鈎住，個鈎仍然有魚絲綁住，兩尺長左右，仲連住“舊”鉛．因為“舊”鉛太重，贅住佢根本游唔到，好淒涼，游來游去都係離地兩尺，見佢掙扎個樣，真係好心痛．想慢慢fin埋去捉住佢，同佢拆咗個鈎，但係又捉唔到，我又冇帶手套．最後只能割斷條魚絲，let it go！

第二個dive - Barracuda point

第三個dive - White Tip Avenue

一直D前輩都話係詩巴單保證睇到海龜．前年一個潛大大話話基本上見面十隻八隻，但是今次最多都係一個潛四五隻．

Night Dive - Jetty

呢個潛玩孤獨，一個人係到影魚毛同蝦毛！

原來D蝦透明係好難Focus嘅！

再戰詩巴單 - 第三Day

2008.07.02

第一個dive 係去 Barracuda Point 睇 Bumphead Parrot Fish．原本 DM話 5:45am的．但據過往經驗，都係早D好！不過都係早15分鐘啫！但係你早時，其他人仲早，去到個site 已經見有兩條船到咗．落到水已經見唔到 Bumphead係個竇到．梗係“曹”醒咗，走晒啦！見唔到 Bumphead，所以唯有繼續前進，希望去到淺水區見番佢地．

左望望右望望，抬高頭見一群唔係好大群嘅Jack．啱啱有個路人甲．

嘩！又係炮彈呀！

我們一路潛，見到幾條鯊魚"僕"係沙地，就靜靜雞埋D再埋D，近D影佢．

影到失晒時間控制，要 DM係前頭猛咁叮我們！都唔記得要在淺水區趕上 Bumphead．結果係見唔到嘅．

上詩巴單島休息時，聽另外同resort嘅另一班大花，佢地話佢地 5:45am出發，遲過我地，但係就啱啱見到！吓！咁都得！整定冇緣．不過原來佢地都只是見到幾十條．震撼嘅場面唔係咁架！以前就見過有幾百條啱啱睡醒，跟住由個竇浩浩蕩蕩咁游出來．佢地係游得好慢嘅．隊伍中，有些“大佬”會好似趕羊仔咁 Guard住成群Bumphead．唉！今朝唔見，唯有寄望後朝！

休息了一會，孖樽人也返來了，佢地話見到 Bumphead又見到 Barracuda！

第二個dive - South Point

第三個dive 去咗 Mandarin Valley (Kapalai)

Hi! Frog Fish ，真係好啦，你冇搬竇，我返嚟探你呀！ 你好嗎？

第四個dive - Jetty

Night dive – Jetty
前年潛Resort 呢個Jetty，多數是下午四點幾，潛第四枝．呢個時間多數會遇上轉流，有時都頂得幾辛苦．
呢一晚成七點至落水，落咗水就逆流向右邊未去過嘅地方去搵野．點知 kick 咗好耐都係一片沙地同幾塊木柵．雖然流唔係好大，但我個 turbo engine kick 到冇晒力，腳都軟埋．啱啱有兩個Buddy得番一百巴，所以便決定掉頭走人！點知差不多到 Jetty時，Buddy 俾條炮彈襲擊，我立刻埋去幫手，開頭攞枝棒棒“對”住佢，但係冇用，仲係擺脫唔到佢．唯有拔我嘅”善良之刀”指住佢，舞咗幾下至走得甩！唉！我把刀係第一次拔咋！呢個潛對於我來說，基本上是一堂 frog kick 嘅 training，仲係開 turbo engine個隻！ 真係有D索氣！

我發覺詩巴單的Crocodile Fish 是比較白色的．

再戰詩巴單 - 第二Day

2008.07.01

雖然話就話12人，但係我們兵分兩路，單樽一邊，孖樽另一邊．我因為學藝未成，只能繼續歎我嘅單樽！

因為6/7月係潛詩巴單最好嘅季節，所以詩巴單呢個被喻為大花“朝聖”的地方，在這星期就“噓憾”到不得了．十條船，平均十個人一條．單單這resort已經有過百大花！但 resort 安排到令大家唔會同一時間迫埋係同一個site．只是一日當中 boat dive 3 個，包括2個詩巴丹 + 1個 Kapalai 或 Mabul．

Dive #1 - Lobster wall (Mabul)

第一次見嘅 Nudi

第二個見到 Sting Ray 嘅 Dive，之後D Dive都冇見到 Lu!

Dive #2 - Coral Garden (詩巴丹)

一早都知道呢種炮彈會咬人，但係估唔到有 Buddy 幾乎被佢咬到．可能是太接近他的竇了．

Dive #3 係最勁嘅 Barracuda point (詩巴丹)．

Jack呀！





呢條傻魚唔知倏做乜鬼！我覺得佢好挍笑！



不過潛完呢兩個，詩巴單給我的感覺是水質差了，
D珊瑚白色多咗，D魚少咗！

搽咗藍色脣膏的魚


呢隻叫 Dwarf Scornpionfish，原來係唯一一種爬行嘅 Scornpion，佢得吋半長左右咋！


本來打算 night的，但因為明早一早5:30am要出發睇 Bumphead，所以我們聽 DM 話唔Night啦．而且見到孖樽仔返來好似好疲倦咁，以為佢地都唔 Night 啦．哈點知原來亞蛇同大師兄去 Night．我費事臨陣變掛，所以原本逢潛都去嘅我就冇同佢兩個一齊去！不過佢地見到Frog Fish呀！

再戰詩巴單 - 第一Day

2008.06.29

十個人十一套gear係香港出發，仲件件都係重量級的，又燈又相機又video，本來都估計會超重．但係原來現在馬航去潛水的話可以寄30kg的行李，所以行李冇超重，不用付附加費！

第一日連續兩程飛機，晚上直達斗湖．在機場再會合其餘兩個在新加坡出發嘅buddy，一行 12人便坐 resort安排的車，去斗湖碼頭旁的 Semporna Seafest Hotel住宿一晚．車程要個半小時，到達住宿的酒店也已經是晚上11:45pm．放下行李便步行至離酒店不遠的一間食店醫肚．因為夜深，這是唯一營業的食肆．不過我們所叫的每一碟餸菜都很好吃．最好味係炸魷魚呀！哇！碟炸魷魚一放低就唔見咗幾塊啦，好搶手呀！

2008.06.30

第二朝十點坐resort 的speedboat，個多小時便到達了resort．做完登記，聽過briefing，吃過午餐，便正式開始6日（實際係5整天）的“食潛睡”節目了．今次DM係 Ralph，仲有個女助手 Susi．其實 Ralph前年都做過我們的 DM，不過前年我們有成20人，佢係隔離船嘅DM．我前年個 DM，原來俾人炒咗魷魚 lu!

Dive #1 – Ray point (Mabul) Check out dive

Check out dive都是俾大家熱身啫．執下D甩甩漏漏．好似我咁，原來背板加2磅鉛都唔夠．結果要攞埋 Susi一“舊”鉛至沉．不過估唔到第一個 dive就見到侏儒海馬．仲俾我唔覺意見到隻"比卡超"潻．

我第一次見"比卡超"咋！不過原來淨係影到個屁股．

仲有呢隻蟹，查完個名唔記得寫低潻！究竟係乜蟹呢？


Dive #2 – 係 House reef．是在 water bungalow 個jetty下面．唔洗錢，任潛．Jetty 下面有一堆堆由石頭同木柵組成的人工珊瑚．以前有兩條成個人咁長嘅花尾躉，不過今次見唔到，估以為俾人食咗，後來至知，原來係搬咗屋，落咗去成20米個處．不過Jetty 多咗D新住客．佢地係 Leaf Frog Fish．Jetty D 魚可能好食好住，條條都比起我上次見嘅大size咗．唔知兩條花尾躉會唔會大隻到好似怪物呢？

Night dive 都係 Jetty．原來間 resort 升咗級，以前 night係包坐船出去，但現在 night出船就要加錢．反正 Jetty 都仲有好多野睇，一於 Jetty 就 Jetty 啦！

超大Box Fish